ട്രിനിഡാഡ് ആന്‍ഡ് ടുബാഗോ : വെസ്റ്റ് ഇന്‍ഡീസും ദക്ഷിണാഫ്രിക്കയും തമ്മിലുള്ള ആദ്യ ടെസ്റ്റ് സമനിലയില്‍ കലാശിച്ചു. അവസാന ദിവസമായ ഇന്ന് 298 റണ്‍സ് വിജയലക്ഷ്യത്തിലേക്ക് ബാറ്റെടുത്ത വിന്‍ഡീസ് രണ്ടാം ഇന്നിങ്സില് അഞ്ച് വിക്കറ്റ് നഷ്ടത്തില്‍ 201 റണ്‍സ് എടുത്തുനില്‍ക്കവേയാണ് മത്സരം സമനിലയില്‍ പിരിഞ്ഞത്.
ഒന്നാം ഇന്നിങ്സില് ദക്ഷിണാഫ്രിക്ക 357 റണ്‍സ് എടുത്തപ്പോള്‍ വെസ്റ്റ് ഇന്‍ഡീസ് 233 റണ്‍സ് എടുത്തിരുന്നു. രണ്ടാം ഇന്നിങ്സില് ദക്ഷിണാഫ്രിക്ക മൂന്ന് വിക്കറ്റ് നഷ്ടത്തില്‍ 173 റണ്‍സ് എന്ന നിലയില്‍ ഡിക്ലയര്‍ ചെയ്താണ് വെസ്റ്റ് ഇന്‍ഡീസിനെ ബാറ്റിങ്ങിന് അയച്ചത്. മത്സരത്തിനിടെ മഴ തടസ്സമായതും രണ്ടാം ഇന്നിങ്സില് വെസ്റ്റ് ഇന്‍ഡീസിന് വേണ്ടി 92 റണ്‍സുമായി അലിക് അതനാസ് നടത്തിയ ചെറുത്തുനില്‍പ്പുമാണ് പ്രോട്ടീസിന്റെ വിജയം തടഞ്ഞത്.
സ്റ്റാര്‍ ഓള്‍റൗണ്ടര്‍ ജെയ്‌സന്‍ ഹോള്‍ഡര്‍ 31 റണ്‍സെടുത്ത് പുറത്താകാതെ നിന്നു. ഒന്നാം ഇന്നിങ്സില് അര്‍ദ്ധ സെഞ്ച്വറികള്‍ നേടിയ ക്യാപ്റ്റന്‍ തെംബ ബവുമ (86), ടോണി ഡി സോര്‍സി (78) എന്നിവരുടെ ഇന്നിങ്സ് കരുത്തിലാണ് പ്രോട്ടീസ് സ്‌കോര്‍ 300 കടത്തിയത്. ഒന്നാം ഇന്നിങ്സില് വിന്‍ഡീസ് നിരയില്‍ ആരും അര്‍ദ്ധ സെഞ്ച്വറി നേടിയില്ല. രണ്ടാം ഇന്നിങ്‌സുകളിലുമായി കേശവ് മഹാരാജ് എട്ട് വിക്കറ്റുകള്‍ വീഴ്ത്തി.
Be the first to comment