മരങ്ങാട്ടുപിള്ളി: ഇന്ത്യയിൽ രണ്ടു കോടി പ്ലാവ് കൃഷി കൃഷിയെന്ന ലക്ഷ്യം പൂർത്തീകരിക്കാൻ മുന്നിട്ടിറങ്ങി മരങ്ങാട്ടുപിള്ളി ലേബർ ഇന്ത്യ ചെയർമാൻ ജോർജ് കുളങ്ങര. കേരളം, തമിഴ്നാട്, ഗുജറാത്ത്, ഡൽഹി എന്നിവിടങ്ങളിലായി ഇതിനോടകം രണ്ടര ലക്ഷത്തിലധികം പ്ലാവിൻ തൈകൾ വിതരണം ചെയ്തു കഴിഞ്ഞു. ചക്കയുടെ ഔഷധഗുണങ്ങൾ മനസിലാക്കി പ്ലാവ് കൃഷി പ്രോത്സാഹിപ്പിക്കുക എന്ന ലക്ഷ്യമാണ് ജോർജ് കുളങ്ങരയ്ക്കുള്ളത്.
അത്യുൽപ്പാദനശേഷിയുള്ള വിയറ്റ്നാം സൂപ്പർ ഏർലി ബഡ് പ്ലാവുകൾ ആണ് കൂടുതലായി വിതരണം ചെയ്യുന്നത്. വിയറ്റ്നാം, മലേഷ്യ, തായ്‌ലൻഡ്, കമ്പോഡിയ തുടങ്ങിയ രാജ്യങ്ങളിൽ വർഷങ്ങൾക്കു മുൻപ് പ്ലാവ് തോട്ട രീതിയിൽ കൃഷി ആരംഭിച്ചു. ചക്കയെ വിവിധ വാണിജ്യ വിഭവങ്ങളായി ലോകമെമ്പാടും വിറ്റ് വിദേശനാണ്യം നേടുന്നു. എന്തുകൊണ്ട് കേരളത്തിൽ ആയിക്കൂടായെന്നു അദ്ദേഹം ചോദിക്കുന്നു.
റബ്ബറിനെ കെട്ടിപ്പിടിച്ച് കരഞ്ഞിട്ടൊന്നും കാര്യമില്ലെന്ന ബോധം കർഷകരിൽ എത്തിക്കണമെന്നും റബ്ബർത്തോട്ടം പോലെ പ്ലാവിൻ തോട്ടങ്ങൾ ഉണ്ടാകണമെന്നും അദ്ദേഹം പറയുന്നു. റബ്ബറും ചക്കയും മൂല്യവർധിത ഉൽപ്പന്നങ്ങളാക്കി ഇന്ത്യൻ മാർക്കറ്റിലും അന്താരാഷ്ട്ര മാർക്കറ്റിലും വിൽക്കാൻ കഴിയും എന്ന തിരിച്ചറിവാണ് ജോർജ് കുളങ്ങരയെ പ്ലാവ് കൃഷിയുടെ പ്രാചാരകൻ ആക്കി മാറ്റിയത്. സ്വന്തം കൃഷിയിടത്തിൽ വാണിജ്യ അടിസ്ഥാനത്തിൽ പ്ലാവ് കൃഷി ചെയ്ത് ഫലം ഉണ്ടായതിനെ തുടർന്നാണ് പ്ലാവ് കൃഷിയെ പ്രോത്സാഹിപ്പിക്കാൻ അദ്ദേഹം മുന്നിട്ടിറങ്ങിയത്.
സർക്കാരിന്റെ പിൻബലത്തോടെ കർഷകർ പ്ലാവ് കൃഷിക്കായി മുന്നോട്ടു വരണമെന്ന് ജോർജ് കുളങ്ങര ആവശ്യപ്പെടുന്നു. കേന്ദ്ര-സംസ്ഥാന സർക്കാരുകൾക്ക് നിരവധി പദ്ധതികളുണ്ട്. കർഷകരെ പ്രോത്സാഹിപ്പിക്കാനാണ് മധ്യകേരള ഫാർമർ പ്രൊഡ്യൂസർ കമ്പനിയും ഗ്രീൻ വേൾഡ് ക്ലീൻ വേൾഡ് ഫൗണ്ടേഷനും. ഫൗണ്ടേഷൻ സബ്സിഡി നിരക്കിൽ വിയറ്റ്നാം സൂപ്പർ ഏർലി ബഡ് പ്ലാവിൻ തൈകൾ വിതരണം നടത്തുന്നുണ്ട്. രണ്ടു വർഷത്തിനുള്ളിൽ കായ്ഫലം തരുന്ന ബഡ് പ്ലാവിൻ തൈകൾ യഥേഷ്ടം ഇവിടെനിന്നു ലഭ്യമാണെന്നും അദ്ദേഹം പറഞ്ഞു.
Be the first to comment