മീനും ഇറച്ചിയും മാത്രമല്ല എത്തിപിടിക്കാനാവാതെ പച്ചക്കറിയും

കോട്ടയം: മീനും ഇറച്ചിയും മാത്രമല്ല പച്ചക്കറിയും വിലക്കയറ്റത്തിൽ ഒന്നാമത്‌ തന്നെ. ഇങ്ങനെ പോയാൽ സാധാരണക്കാരന്റെ കുടുംബ ബജറ്റ്‌ പ്രതിസന്ധിയിലാകുമെന്ന്‌ ഉറപ്പ്‌. വിപണിയിൽ അവശ്യസാധനങ്ങളുടെ വിലക്കയറ്റം രൂക്ഷമാണ്‌. പലവ്യഞ്ജന വസ്തുക്കൾക്കൊപ്പം പച്ചക്കറികളുടെയും വില കുതിച്ചുയരുകയാണ്. കടുത്ത ചൂടും സമയം തെറ്റിയുള്ള മഴയും കാരണം തമിഴ്​നാട്​, ആന്ധ്ര എന്നിവിടങ്ങളിൽനിന്നുള്ള വരവ് കുറഞ്ഞതുമാണ്‌ പച്ചക്കറിയുടെ വില ഉയരാൻ കാരണമെന്ന് കച്ചവടക്കാർ പറയുന്നു.

നൂറും ഇരുന്നൂറും കടന്ന് മുന്നോട്ട് കുതിക്കുകയാണ് പച്ചക്കറികൾ. ഒട്ടുമിക്ക പച്ചക്കറികൾക്കെല്ലാം വില അമ്പതിന്‌ മുകളിലാണ്​. കഴിഞ്ഞമാസം മൊത്തവ്യാപാര വിപണിയിൽ 46 രൂപയായിരുന്ന മുരിങ്ങക്കായുടെ വില 240 രൂപയായി. തക്കാളിയുടെ വില കിലോക്ക്​ 100ന്‌ മുകളിലാണ്‌. മുളക്​, ബീൻസ്​, കാരറ്റ്​, വഴുതനങ്ങ, കത്രിക്ക, ബീറ്റ്​റൂട്ട്​ തുടങ്ങിയവ കാൽകിലോ അറുപത്‌ രൂപയ്‌ക്ക്‌ മുകളിലാണ് വില. കഴിഞ്ഞ മാർച്ചിൽ തുടങ്ങിയ വിലക്കയറ്റം മാസങ്ങൾ​ പിന്നിട്ടിട്ടും മാറ്റമില്ലാതെ തുടരുകയാണ്​. വിലകൂടിയതോടെ കച്ചവടം കുറഞ്ഞതായി വ്യാപാരികൾ പറയുന്നു. വരും ദിവസങ്ങളിൽ ചുരുക്കം ചില പച്ചക്കറികൾക്ക്‌ വില കുറയാനും സാധ്യതയുണ്ടെന്ന്‌ ഇവർ പറയുന്നു.

കോട്ടയം ചന്തയിലെ 
പച്ചക്കറികളുടെ വ്യാപാരവില:

മുളക്​ – 160, ഇഞ്ചി (കാൽകിലോ) –60, വെളുത്തുള്ളി (കാൽകിലോ)– 70, കാരറ്റ് –-  70, ബീറ്റ്​റൂട്ട്​–  80, വെണ്ടക്ക – 40, ബീൻസ് – 140, സവാള – 40, പയർ –  60, ചുവന്നുള്ളി – 90.