കോട്ടയം : കുരുമുളക്, ഗ്രാമ്പൂ, ഏലയ്ക്ക തുടങ്ങിയ സുഗന്ധവ്യഞ്ജനങ്ങൾ എത്തിച്ച് നൽകാമെന്നു പറഞ്ഞ് സ്‌പൈസസ് സ്ഥാപനത്തിന്റെ പേരിൽ പണം തട്ടിയ യുവാവിനെ അറസ്റ്റ് ചെയ്തു. തിരുവനന്തപുരം സ്വദേശികളെ കബളിപ്പിച്ച് പണം തട്ടിയ തമിഴ്നാട് തൂത്തുക്കുടി സ്വദേശിയായ മുഹമ്മദ് നൗഫൽ (29) നെയാണ് ചിങ്ങവനം പോലീസ് അറസ്റ്റ് ചെയ്തത്.
കോട്ടയം മണിപ്പുഴയിൽ പ്രവർത്തിക്കുന്ന സ്‌പൈസസ് സ്ഥാപനത്തിന്റെ പേരിലാണ് മുഹമ്മദ് നൗഫൽ തട്ടിപ്പു നടത്തിയത്. തിരുവനന്തപുരം സ്വദേശികൾക്ക് കുരുമുളക്, ഗ്രാമ്പൂ, ഏലയ്ക്ക മുതലായവ എത്തിച്ച് നൽകാമെന്നുപറഞ്ഞ് സ്ഥാപനത്തിന്റെ പേരിൽ വ്യാജ സെയിൽസ് ഇൻവോയ്സ് നിർമ്മിച്ച് അയച്ചുനല്‍കി പണം തട്ടിയെടുക്കുകയായിരുന്നു. പരാതിയെ തുടർന്ന് നടത്തിയ ശാസ്ത്രീയമായ പരിശോധനയിൽ സ്ഥാപനത്തിന്റെ പേരിൽ തട്ടിപ്പ് നടത്തിയ മുഹമ്മദ് നൗഫലിനെ കണ്ടെത്തി പിടികൂടുകയുമായിരുന്നു.
ചിങ്ങവനം സ്റ്റേഷൻ എസ് എച്ച് ഒ പ്രകാശ് ആർ, എ എസ് ഐ മനോജ്കുമാര്‍ ,സി പി ഒ മാരായ ജോൺ ബോസ്കോ, സഞ്ജിത്ത് എന്നിവർ ചേർന്നാണ് അറസ്റ്റ് ചെയ്തത്. കോടതിയിൽ ഹാജരാക്കിയ മുഹമ്മദ് നൗഫലിനെ റിമാൻഡ് ചെയ്തു.
Be the first to comment