ആഗോള തലത്തിലെ അതിസമ്പന്നരുടെ സ്വത്തില്‍ വരും വര്‍ഷങ്ങളില്‍ വന്‍ കുതിപ്പുണ്ടാകുമെന്ന് റിപ്പോര്‍ട്ട്. ലോകത്തെ ആദ്യ മഹാ കോടീശ്വര്‍ ( ട്രില്യണയർ) എന്ന ഖ്യാതി ടെസ്ല സിഇഒ ഇലോണ്‍ മസ്‌ക് സ്വന്തമാക്കും എന്നാണ് റിപ്പോര്‍ട്ടുകള്‍. 2027 ഓടെ എലോണ്‍ മസ്‌ക് ഈ നേട്ടം കൈവരിക്കുമെന്ന് ‘ഇന്‍ഫോര്‍മ കണക്റ്റ് അക്കാദമി’ പുറത്തിറക്കിയ റിപ്പോര്‍ട്ട് പറയുന്നു. ഇന്ത്യക്കാരനായ ഗൗതം അദാനിയും ലോകത്തെ മഹാ കോടീശ്വര പട്ടികയില്‍ രണ്ടാമനാകും എന്നും റിപ്പോര്‍ട്ട് ചൂണ്ടിക്കാട്ടുന്നു. 2028 ഓടെ ഗൗതം അദാനി ഈ നേട്ടം കൈവരിക്കുമെന്നാണ് റിപ്പോര്‍ട്ട് ചൂണ്ടിക്കാട്ടുന്നത്.
കഴിഞ്ഞ വെള്ളിയാഴ്ചയാണ് ‘ഇന്‍ഫോര്‍മ കണക്റ്റ് അക്കാദമി’ ‘2024 ട്രില്യൺ ഡോളർ’ ക്ലബ് റിപ്പോർട്ട് പ്രസിദ്ധീകരിച്ചത്. ഇലക്ട്രിക് കാർ നിർമാതാക്കളായ ടെസ്ല, സ്വകാര്യ ബഹിരാകാശ കമ്പനിയായ സ്‌പേസ് എക്‌സ്, സോഷ്യൽ മീഡിയ പ്ലാറ്റ്‌ഫോം എക്‌സ് (മുമ്പ് ട്വിറ്റർ) എന്നിവയുടെ ഉടമയായ മസ്കിന്റെ സമ്പത്ത് ശരാശരി 110 ശതമാനം വാർഷിക നിരക്കിൽ വളരുകയാണെന്ന് ഇൻഫോർമ കണക്റ്റ് അക്കാദമി റിപ്പോർട്ട് ചൂണ്ടിക്കാട്ടുന്നു. ബ്ലൂംബെർഗ് ബില്യണയർ സൂചിക പ്രകാരം 237 ബില്യൺ ഡോളർ ആസ്തിയുള്ള മസ്‌ക് നിലവിൽ ലോകത്തിലെ ഏറ്റവും ധനികനാണ്.
വാർഷിക സമ്പത്ത് വളർച്ചാ നിരക്ക് 123 ശതമാനമായി തുടർന്നാൽ 2028 ൽ ഗൗതം അദാനി ലോകത്തെ രണ്ടാമത്തെ ട്രില്യണയർ എന്ന പദവി നേടുമെന്നാണ് റിപ്പോർട്ട് പറയുന്നത്. ഗൗതം അദാനിക്ക് നിലവിൽ 7,14,460 കോടി രൂപയുടെ (ഏകദേശം 85.5 ബില്യൺ യുഎസ് ഡോളർ) ആസ്തിയുണ്ട്.
എൻവിഡിയയുടെ ജെൻസൻ ഹുവാങ്, ഇന്തോനേഷ്യൻ എനർജി, ഖനന മുതലാളി പ്രജോഗോ പാൻഗെസ്റ്റു എന്നിവർ അവരുടെ വളർച്ചാ അതേപടി തുടർന്നാൽ 2028-ഓടെ അദാനിക്ക് പിന്നാലെ ട്രില്യണയർ ആകാനുള്ള സാധ്യതയുണ്ട്. 181 ബില്യൺ ഡോളർ ആസ്തിയുള്ള ലോകത്തിലെ മൂന്നാമത്തെ വലിയ ധനികനായ എൽവിഎംഎച്ചിലെ ബെർണാഡ് അർനോൾട്ട്, മെറ്റയുടെ സി.ഇ.ഒ മാർക്ക് സക്കൻബർഗ് എന്നിവർ 2030-ഓടെ ഒരു ട്രില്ല്യണയറായി മാറിയേക്കാം.
1916-ൽ സ്റ്റാൻഡേർഡ് ഓയിലിൻ്റെ ജോൺ ഡി റോക്ക്ഫെല്ലർ ലോകത്തിലെ ആദ്യത്തെ ശതകോടീശ്വരനായി മാറിയത് മുതൽ ലോകത്തിലെ ആദ്യത്തെ മഹാകോടീശ്വരൻ ആരാകുമെന്ന ചോദ്യങ്ങൾ സജീവമാണ്. നിലവിലുള്ള ചുരുക്കം ചില കമ്പനികൾ മാത്രമാണ് മൂല്യനിർണ്ണയത്തിൽ ഒരു ട്രില്യൺ ഡോളർ കടന്നത്. മൈക്രോസോഫ്ട്, ആപ്പിൾ, ആൽഫബെറ്റ്, ആമസോൺ, മെറ്റാ തുടങ്ങിയ കമ്പനികൾ ഇതിൽ ഉൾപ്പെട്ടിട്ടുണ്ട്.
അതേസമയം ആഗോളതലത്തിൽ വൻകിട മുതലാളിമാരിൽ സമ്പത്ത് ഏകീകരിക്കുന്നതിനെ വലിയ ആശങ്കയോടെയാണ് വിദഗ്‌ധർ കാണുന്നത്.
Be the first to comment