ദീപിക മിശ്ര; ഇന്ത്യൻ വ്യോമസേനയുടെ ഗാലൻട്രി അവാർഡ് നേടുന്ന ആദ്യ വനിത

ഇന്ത്യൻ വ്യോമസേനയുടെ ഗാലൻട്രി അവാർഡ് നേടുന്ന ആദ്യ വനിതാ ഓഫീസറായി വിംഗ് കമാൻഡർ ദീപിക മിശ്ര. ഹെലികോപ്റ്റർ പൈലറ്റായ ദീപിക രാജസ്ഥാൻ സ്വദേശിയാണ്. മധ്യപ്രദേശിലെ വെള്ളപ്പൊക്ക ദുരിതാശ്വാസ പ്രവർത്തനങ്ങളിൽ കാഴ്ചവെച്ച അസാമാന്യ ധൈര്യത്തിനാണ് വ്യോമസേന ദീപിക മിശ്രക്ക് ഗാലൻട്രി അവാർഡ് നൽകി ആദരിച്ചത്. ഇന്ത്യൻ വ്യോമസേനയുടെ ചരിത്രത്തിൽ ധീരതയ്ക്കുള്ള പുരസ്‌കാരം ലഭിക്കുന്ന ആദ്യ ഇന്ത്യൻ വ്യോമസേനാ വനിതയാണ് ദീപിക മിശ്ര

സുബ്രതോ പാർക്കിലെ എയർഫോഴ്‌സ് ഓഡിറ്റോറിയത്തിൽ നടന്ന ചടങ്ങിൽ ഐഎഎഫ് മേധാവി എയർ ചീഫ് മാർഷൽ വിആർ ചൗധരി അവാർഡുകൾ വിതരണം ചെയ്തു. വ്യോമസേനയിലെ രണ്ട് ഉദ്യോഗസ്ഥർക്ക് യുദ്ധ സേവാ മെഡലും 13 ഓഫീസർമാർക്കും വ്യോമസേനാ മെഡലുകൾക്കും 13 ഉദ്യോഗസ്ഥർക്ക് വായുസേന മെഡലും 30 വിശിഷ്ട സേവാ മെഡലുകളും വിതരണം ചെയ്തു. വ്യോമസേനയിൽ നിന്ന് 57 പേരും ആർമിയിൽ നിന്ന് ഒരാളും ഉൾപ്പെടെ ആകെ 58 പേർ അവാർഡുകൾ ഏറ്റുവാങ്ങി.

വടക്കൻ മധ്യപ്രദേശിലുണ്ടായ വെള്ളപ്പൊക്കത്തിന്റെ രക്ഷാപ്രവർത്തനത്തിൽ സജീവമായി നിന്ന വനിതാ ഉദ്യോഗസ്ഥരായിൽ മുൻ നിരയിൽ ദീപിക ഉണ്ടായിരുന്നു. ലോ-ഹോവർ പിക്കപ്പും വിഞ്ചിംഗും ഉൾപ്പെടെയുള്ള അപകടകരമായ രക്ഷപ്രവർത്തനങ്ങളിൽ എട്ട് ദിവസവും വിംഗ് കമാൻഡർ മിശ്ര നയിച്ചു. സ്ത്രീകളും കുട്ടികളുമടക്കം 47 പേരുടെ ജീവനാണ് ഇവർ രക്ഷിച്ചത്. ദീപിക മിശ്രയുടെ ധീരമായ പ്രയത്‌നങ്ങൾ പ്രകൃതിദുരന്തത്തിൽ അകപ്പെട്ട വിലപ്പെട്ട ജീവൻ രക്ഷിക്കുക മാത്രമല്ല, പ്രളയബാധിത പ്രദേശത്തെ പൊതുജനങ്ങളിൽ സുരക്ഷിതത്വബോധം വളർത്തുകയും ചെയ്‌തതായി അധികൃതർ പറഞ്ഞു.