രോ​ഗമെന്ന് കേട്ടാലേ മരുന്നെടുത്ത് വിഴുങ്ങുന്ന സ്വഭാവമുണ്ടോ? ; പാര്‍ശ്വഫലങ്ങള്‍ അറിയാതെ പോകരുത്

എന്തെങ്കിലുമൊരു ചെറിയ അസുഖം വരുമ്പോഴെ മരുന്നെടുത്ത് വിഴുങ്ങുന്ന ശീലമുണ്ടോ? നിലവിലെ അസുഖം മാറാൻ കഴിക്കുന്ന മരുന്നുകൾ ചിലപ്പോള്‍ മറ്റൊരസുഖത്തിന് വളമാകാം. പ്രായമാകുന്തോറും ശരീരത്തെ പിടിച്ചു മുറുക്കുന്ന രോ​ഗങ്ങളുടെ എണ്ണവും കൂടും. പ്രമേഹവും ഉയർന്ന രക്തസമ്മർദവും ഒരു വശത്ത് നടുവേദനയും ഉറക്കമില്ലായ്മയും മറുവശത്ത്. പല രോ​ഗങ്ങൾക്കും പല മരുന്നുകളും. അതിനിടെ തലവേദന വരുമ്പോൾ സ്വയം ചികിത്സയുടെ ഭാ​ഗമായി അടുത്ത മരുന്ന്.

പല രോ​ഗങ്ങൾക്കായി ദിവസം തോറും നിരവധി മരുന്നുകൾ കഴിക്കുന്നവർ തീർച്ചയായും അതിന്റെ സൈഡ് ഇഫക്ടറുകളെ കുറിച്ചു കൂടി ബോധവാന്മാരായിരിക്കണം. ആദ്യം രോ​ഗ ശമനമുണ്ടാക്കുമെങ്കിലും പിന്നീട് ഇതേ മരുന്നുകൾ തന്നെ ശരീരത്തിന് പാര്‍ശ്വഫലങ്ങള്‍ ഉണ്ടാക്കാം. ഇത് വൈജ്ഞാനിക തകര്‍ച്ചയ്ക്കും ആരോ​ഗ്യം മോശമാകാനും കാരണമാകും.

ചില മരുന്നുകളുടെ പാര്‍ശ്വഫലമായി ഉറക്കമില്ലായ്മ, ക്ഷീണം, അസ്വസ്ഥത, വീക്കം, ഡിമെന്‍ഷ്യ തുടങ്ങിയവ ഉണ്ടാവാം. ഇത്തരം ആരോഗ്യപ്രശ്‌നങ്ങള്‍ നമ്മള്‍ കഴിക്കുന്ന മരുന്നകള്‍ കാരണമാകാമെന്ന് പലര്‍ക്കും അറിയില്ല. ഇത് അറിയാതെ മറ്റൊരു ഡോക്ടറെ കണ്ട് അടുത്ത മരുന്ന് വാങ്ങി കഴിക്കുകയാണ് പതിവ്.

ഒരു മരുന്ന് ഉണ്ടാക്കുന്ന പാര്‍ശ്വഫലം അകറ്റാന്‍ അടുത്ത മരുന്ന് കഴിക്കും പിന്നീട് ഇതുണ്ടാക്കുന്ന പാര്‍ശ്വഫലമകറ്റാന്‍ വീണ്ടും മറ്റൊന്ന് – ഈ പ്രക്രിയയെ ആണ് ‘പ്രിസ്‌ക്രൈബിങ് കാസ്‌കേഡ്’ എന്ന് വിളിക്കുന്നത്. ചില മരുന്നുകള്‍ വര്‍ഷങ്ങളായി തുടരുന്നത് ശരീരത്തിന് ദോഷം ചെയ്യാം. ചിലത് പുതിയ മരുന്നുമായി ദോഷമായി പ്രതികരിക്കുകയോ, പ്രവര്‍ത്തനം നില്‍ക്കുകയോ ചെയ്യുന്നു. പ്രായമാകുമ്പോറും നമ്മുടെ ശരീരത്തിന്റെ മെറ്റബോളിസത്തില്‍ മാറ്റം വരാം. രോ​ഗം മാറാൻ കഴിക്കുന്ന മരുന്നുകൾ തന്നെ നമ്മെ നിത്യരോ​ഗിയാക്കാം.

ഡിപ്രിസ്‌ക്രൈബിങ്

സ്വയം ചികിത്സയും ഓരോ അസുഖത്തിനും പല ഡോക്ടര്‍മാരെ കാണുന്നതും കാരണം നിങ്ങള്‍ കഴിക്കുന്ന മരുന്നുകളെ കുറിച്ച് ഡോക്ടര്‍മാര്‍ക്ക് ധാരണയുണ്ടാകണമെന്നില്ല. അതിനാല്‍ അത് കൃത്യമായി ആരോ​ഗ്യ വിദ​ഗ്ധരുമായി ആശയവിനിമയം നടക്കേണ്ടത് പ്രധാനമാണ്. നിങ്ങൾ കഴിക്കുന്ന മരുന്നുകളുടെ ഒരു പട്ടിക കൃത്യമായി തയ്യാറാക്കി വെക്കുക.