കോട്ടയം: ഗാന്ധിനഗർ -മെഡിക്കൽ കോളേജ് റോഡ് അന്തർദേശീയ നിലവാരത്തിൽ. കോട്ടയത്തെ ലൈഫ് ലൈൻ റോഡ് എന്ന് വിശേഷിപ്പിക്കപ്പെടുന്ന ഗാന്ധിനഗർ – മെഡിക്കൽ കോളേജ് റോഡാണ് അന്തർദേശീയ നിലവാരത്തിൽ പുതുക്കി പണിതത്. മെഡിക്കൽ കോളേജിലേക്ക് രോഗികളുമായി ആംബുലൻസുകളും മറ്റ് വാഹനങ്ങളും എത്തുന്നത് പ്രധാനമായും ഈ റോഡിലൂടെയാണ്. ഗാന്ധിനഗർ ജംഗ്ഷൻ മുതൽ മെഡിക്കൽ കോളജ് ജംഗ്ഷൻ വരെ നീളുന്ന റോഡിന് 2 കിലോമീറ്റർ ദൂരമുള്ള റോഡിൻ്റെ പല ഭാഗങ്ങളിലും ആവശ്യമായ വീതിയും സൗകര്യവും ഉണ്ടായിരുന്നില്ല. ഇതിന് പരിഹാരമായാണ് പുതിയ റോഡിന്റെ പണി പൂർത്തിയാക്കിയിരിക്കുന്നത്.
12 മീറ്റർ ടാറിങ് റോഡും ഇരുവശങ്ങളിലും ഒന്നര മീറ്റർ നടപ്പാതയും ഉൾപ്പെടെ 16 മീറ്റർ വീതിയാണ് പുതിയ റോഡിനുള്ളത്. കോട്ടയം മെഡിക്കൽ കോളജിലേക്കുള്ള സുഗമമായ യാത്രാ മാർഗം ഒരുക്കുകയെന്ന ലക്ഷ്യത്തോടെ 121 കോടി രൂപയാണ് വിവിധ പദ്ധതികൾക്കായി അനുവദിച്ചത്. ഇതിൽ നിന്നാണ് ഈ റോഡിനും തുക കണ്ടെത്തിയത്.
രണ്ട് വരി പാത, 8 ബസ് കാത്തിരുപ്പു കേന്ദ്രങ്ങൾ, ഇരു വശങ്ങളിലും നടപ്പാത, ആവശ്യമുള്ള ഭാഗങ്ങളിൽ ബാരിക്കേഡ് എന്നിവ പദ്ധതിയുടെ ഭാഗമായി നിർമിച്ചിട്ടുണ്ട്. റോഡിന്റെ വശങ്ങളിലും പ്രധാന സ്ഥലങ്ങളിലും സുരക്ഷാ ബോർഡുകളും ദിശാബോർഡുകളും സ്ഥാപിച്ചിട്ടുണ്ട്.
റോഡ് നിർമാണത്തിന്റെ ഭാഗമായി അപകടകരമായതും അസൗകര്യമായ യതുമായ നൂറിലേറെ പാഴ് മരങ്ങളടക്കം മുന്നൂറ്റി അൻപതിലധികം മരങ്ങൾ വെട്ടി മാറ്റിയിരുന്നു. അതുമൂലം നഷsപ്പെട്ട പഴയ പച്ചപ്പ് തിരികെ എത്തിക്കാനുള്ള നടപടികളും ഉടൻ ആരംഭിക്കും.
വിവിധ സംഘടനകളുടെയും തദ്ദേശ വകുപ്പുകളുടെ നേതൃത്വത്തിൽ റോഡിനിരുവശവും സൗന്ദര്യവൽക്കരണം നടപ്പിലാക്കുമെന്ന് മന്ത്രി വി എൻ വാസവൻ പറഞ്ഞു. വനവൽക്കരണത്തിന്റെ ഭാഗമായി ഇവ നട്ടു പിടിപ്പിക്കുമെങ്കിലും എല്ലാം റോഡ് അരികിലായിരിക്കില്ല. കൽക്കെട്ടിനും റോഡിനും ഭീഷണി ഉണ്ടാകാത്ത നിലയിലുള്ള മരങ്ങൾ ഗതാഗത മാർഗങ്ങൾ തടസ്സമാകാത്ത വിധം നട്ടുപിടിപ്പിക്കും. അതോടെ മനോഹരമായ ഒരു റോഡായി ഇതു മാറുമെന്നും മന്ത്രി പറഞ്ഞു.
എം സി റോഡിന്റെ സമാന്തരപാതയായ കുടയംപടി -ചുങ്കം – മെഡിക്കൽ കൊളേജ് റോഡിന്റെ റീടാറിങ്ങ് നടന്നു കൊണ്ടിരിക്കുകയാണ്. അതുകൂടി പൂർത്തിയാകുന്നതോടെ മധ്യകേരളത്തിലെ എറ്റവും പ്രധാന മെഡിക്കൽ കോളേജായ കോട്ടയം ഗവൺമെൻ്റ് മെഡിക്കൽ കൊളേജിലേക്കുള്ള പ്രാധാനപാതകൾ എല്ലാം പൂർണ്ണമായും സജ്ജമാവുമെന്നും മന്ത്രി അറിയിച്ചു.
Be the first to comment