ലഹരിയിൽ വീഴുന്ന പുതുതലമുറ… കരുതലോടെ വളർത്താം നമ്മുടെ മക്കളെ

Say No to Drugs എന്നൊക്കെയുള്ള കാമ്പയിനുകൾ സർക്കാർ ഉൾപ്പെടെയുള്ള സംവിധാനങ്ങൾ സംഘടിപ്പിക്കുമ്പോഴും വരും തലമുറയെ പൂർണമായും നശിപ്പിക്കുന്ന തരത്തിൽ കേരളം ഒരു Drug coridoor ആയെന്നത് യാഥാർഥ്യമാണ്. ഇതൊക്കെ ബന്ധപ്പെട്ടവർ കാണാത്തതോ അതിനെയൊക്കെ നിയന്ത്രിക്കാൻ നമ്മുടെ നാട്ടിൽ നിയമ സംവിധാനങ്ങൾ ഇല്ലാത്തതോ അല്ല. അധികാരികൾ ഉണർന്ന് പ്രവർത്തിച്ച് നമ്മുടെ കുഞ്ഞുങ്ങളെ രക്ഷിക്കുമെന്നും ഈ വിപത്തിനെ ഉൻമൂലനം ചെയ്യുമെന്നും നാം ഇനിയും വിശ്വസിക്കുന്നതിൽ അർത്ഥമില്ല.

എന്റെ കുഞ്ഞ് പഠിക്കുന്ന സ്കൂളിൽ ഇതൊന്നും നടക്കില്ലെന്നും അവിടെ ഭയകര സ്ട്രിക്റ്റാണെന്നും അഭിമാനിക്കാനും വകയില്ല. Anti drug campaign നടത്തിയത് കൊണ്ടോ ഒരു Marathonഅല്ലെങ്കിൽ Cyclothone നടത്തിയത് കൊണ്ടോ കാര്യമില്ല. കുട്ടികളെ Assertive ആകാൻ train ചെയ്യണം. ഒരു സുഹൃത്തിനെ നഷ്ടപെടുമെന്ന് ഭയന്നോ കൂട്ടുകാരുടെ മുന്നിൽ Smart ആകാനോ Attention നേടിയെടുക്കാനോ കുട്ടികൾ ലഹരി ഉപയോഗത്തിലേക്ക് പോകാം. കൂട്ടുകാർ വർണ്ണിക്കുന്നത് കേട്ടിട്ടോ സിനിമകളോ സീരീസുകളിലോ ലഹരി ഉപയോഗിക്കുന്നത് കണ്ടിട്ടോ ഞാനും ഒന്ന് ശ്രമിച്ചാലോയെന്ന് കുട്ടികൾ ചിന്തിക്കാം.

ലഹരി ഉപയോഗം ശാരീരികവും മാനസികവുമായി ഉണ്ടാകുന്ന ബുദ്ധിമുട്ടുകൾ എന്തൊക്കെയെന്ന് കുട്ടികളെ ബോധ്യപ്പെടുത്തണം. ലഹരി വസ്തുക്കൾ മസ്തിഷ്ക്കത്തിൽ ഉണ്ടാക്കുന്ന ആഘാതം എന്താണെന്നും കുട്ടികൾ അറിയണം. എങ്ങനെയൊക്കെ ചതിക്കപ്പെടാൻ സാധ്യതയുണ്ടെന്നും അവർ അറിയണം. നാട്ടിൽ നടക്കുന്ന ഇത്തരം വാർത്തകൾ കുടുംബത്തിൽ ചർച്ചയാക്കണം. ഇക്കാര്യത്തിൽ നിങ്ങളുടെ കുട്ടിയുടെ കാഴ്ചപാട് എന്താണെന്നും മനസിലാക്കണം.

കുട്ടികൾക്ക് രക്ഷിതാക്കൾ  മാതൃകയാകണം. നിർബന്ധിച്ചോ ഭീഷണിപ്പെടുത്തിയോ എന്തെങ്കിലും ചെയ്യിക്കാൻ ആരങ്കിലും ശ്രമിച്ചാൽ അതിൽ വീണ് പോകാതെ മുതിർന്നവരെ അറിയിക്കണമെന്നത് കുട്ടിയെ പഠിപ്പിക്കണം. രക്ഷിതാക്കൾ കുട്ടികളുമായി നല്ല ബന്ധം പുലർത്തുകയും അവരിൽ വിശ്വാസം വളർത്തിയെടുക്കേണ്ടതും അത്യാവശ്യമാണ്. എന്ത് കാര്യത്തിനും കുട്ടികളോട് ദേഷ്യപ്പെടുകയും അവരെ അംഗീകരിക്കാത്ത വിധം പെരുമാറുകയും ചെയ്യുന്ന രക്ഷിതാക്കളിൽ കുട്ടികൾക്ക് വിശ്വാസമുണ്ടാകില്ല.

ആരാണ് കുട്ടികളുടെ കൂട്ടുകാരെന്ന് രക്ഷിതാക്കൾ നിർബന്ധമായും അറിഞ്ഞിരിക്കണം. അവരുമായും ബന്ധം സൂക്ഷിക്കാൻ ശ്രമിക്കണം. അവരുടെ രക്ഷിതാക്കളുമായും ബന്ധം ഉണ്ടാക്കാൻ കഴിഞ്ഞാൽ ഏറ്റവും ഉത്തമം. കുട്ടികളിൽ ഉണ്ടാകുന്ന പെരുമാറ്റ വ്യത്യാസങ്ങൾ തിരിച്ചറിയാൻ കഴിയണം.
അസ്വാഭാവികമായി വൈകി വരിക, ആരോടും അധികം ഇടപഴകാതെ തനിച്ചിരിക്കാൻ ഇഷ്ടപ്പെടുക, അമിതമായ ദേഷ്യം, ഉറക്കത്തിൽ ഉണ്ടാകുന്ന വ്യത്യാസം, ഭക്ഷണക്രമത്തിലെ വ്യത്യാസം, പഠനത്തിൽ പിന്നോക്കം പോകുക, രഹസ്യമായി ഫോണുപയോഗിക്കുകയോ ആരോടങ്കിലും സംസാരിക്കുകയോ ചെയ്യുക, കുട്ടിയുടെ മുറിയിൽ മറ്റാരെയും കയറാൻ അനുവദിക്കാതിരിക്കുക ഇതൊക്കെ രക്ഷകർത്താക്കൾ ശ്രദ്ധിക്കേണ്ട കാര്യങ്ങളാണ്. ഇവയൊക്കെ ശ്രദ്ധയിൽപ്പെട്ടാൽ കുട്ടിയെ നിരീക്ഷിക്കുകയും അടിയന്തിരമായി ഒരു മാനസികാരോഗ്യ വിദഗ്ധന്റെ സഹായം തേടേണ്ടതുമാണ്.