സൂര്യതാപവും സൂര്യാഘാതവും ഏൽക്കാൻ സാധ്യത; പാലക്കാട് വീണ്ടും ഉഷ്ണ തരംഗ മുന്നറിയിപ്പ്

പാലക്കാട് ജില്ല ചുട്ടുപൊള്ളുന്നത് തുടരുകയാണ്. സംസ്ഥാനത്തെ ഏറ്റവും ഉയര്‍ന്ന ചൂടാണ് തുടർച്ചയായ ദിവസങ്ങളിൽ പാലക്കാട്ട് അനുഭവപ്പെട്ടു കൊണ്ടിരിക്കുന്നത്. 41.6°c ചൂട് ആണ് ഇന്നലെ പാലക്കാട് അനുഭവപ്പെട്ടത്. സാധാരണയെക്കാള്‍ 5.5°c കൂടുതലാണിത്. ഇന്നും പാലക്കാട് 41°Cന് മുകളിൽ ചൂട് അനുഭവപ്പെടുമെന്ന് മുന്നറിയിപ്പ് കാലാവസ്ഥാ വകുപ്പ് അറിയിച്ചിട്ടുണ്ട്. ശനിയാഴ്ച 41.8°c ചൂട് ആണ് പാലക്കാട് രേഖപ്പെടുത്തിയത്. ഒരാഴ്ചയായി ജില്ലയിൽ 41 ന് മുകളിലാണ് താപനില.

പാലക്കാട് ജില്ലയിലെ വിവിധ പ്രദേശങ്ങളിൽ സ്ഥാപിച്ചിട്ടുള്ള വെതർ സ്റ്റേഷനുകളിൽ 44°c മുകളിൽ വരെ ചൂട് രേഖപ്പെടുത്തിയിട്ടുണ്ട്. മങ്കരയിൽ 44.6 °c, മലമ്പുഴ 43.7°c, പോത്തുണ്ടി 43 °c, കൊല്ലങ്കോട് 42.4°c എന്നിങ്ങനെയാണ് വിവിധ കേന്ദ്രങ്ങളിൽ രേഖപ്പെടുത്തിയ ചൂട്’. ഉഷ്ണ തരംഗവും പാലക്കാട് ജില്ലയിൽ കഴിഞ്ഞ ദിവസം സ്ഥിതീകരിച്ചിരുന്നു.

1987 ലും 41.8°c രേഖപെടുത്തിയിരുന്നു. 2016 ഏപ്രില്‍ 27 ന് രേഖപെടുത്തിയ 41.9°c ആണ് 1951ന് ശേഷം സംസ്ഥാനത്ത് രേഖപെടുത്തിയ ഏറ്റവും ഉയര്‍ന്ന താപനില. ചൂട് കാരണം വോട്ടിങ്ങിനിടെ 3 പേർ കുഴഞ്ഞ് വീണ് ജില്ലയിൽ മരിച്ചിരുന്നു. മാത്രമല്ല സൂര്യാതപവും നിർജലീകരണവും കാരണം മൂന്നുപേരും മരണപ്പെട്ടു. നിരവധി പേർക്ക് സൂര്യതാപവുമേറ്റിരുന്നു. സൂര്യതാപവും സൂര്യാഘാതവും പാലക്കാട് ജില്ലയിൽ ഏൽക്കാൻ സാധ്യതയുണ്ടെന്ന മുന്നറിയിപ്പുമുണ്ട്. വലിയ ജാഗ്രത നിർദേശമാണ് ജില്ലാ ഭരണകൂടവും ആരോഗ്യ വകുപ്പും പാലക്കാട്ട് പ്രഖ്യാപിച്ചിരിക്കുന്നത്.