ഒരു തലമുറയിലെ സിനിമാപ്രേമികളില്‍ വലിയ സ്വാധീനം സൃഷ്ടിച്ച ചിത്രമായിരുന്നു 1978 ല്‍ ഭരതന്റെ സംവിധാനത്തിൽ പുറത്തിറങ്ങിയ രതിനിര്‍വേദം. ജയഭാരതി രതി ചേച്ചിയായും കൃഷ്ണ ചന്ദ്രന്‍ പപ്പുവുമായി എത്തിയ ചിത്രം അക്കാലത്തെ വലിയ ഹിറ്റുകളില്‍ ഒന്നായിരുന്നു. പത്മരാജനായിരുന്നു ചിത്രത്തിന്റെ തിരക്കഥയൊരുക്കിയത്.
2011 ല്‍ ശ്വേത മേനോന്‍, ശ്രീജിത്ത് വിജയ് എന്നിവരെ കേന്ദ്രകഥാപാത്രങ്ങളാക്കി രതിനിര്‍വേദം റീമേക്ക് ചെയ്തിരുന്നു. ടി.കെ രാജീവ് കുമാറായിരുന്നു ചിത്രത്തിന്റെ സംവിധായകന്‍. ഇപ്പോഴിതാ രണ്ട് തലമുറയിലുള്ള പപ്പു, രതി ചേച്ചിമാര്‍ ഒന്നിച്ചെത്തിയ ചിത്രമാണ് സോഷ്യല്‍ മീഡിയയിൽ വൈറലായിരിക്കുന്നത്.
താരസംഘടനയായ അമ്മയുടെ ഇന്നലെ നടന്ന വാര്‍ഷിക ജനറല്‍ ബോഡി യോഗത്തിലാണ് ജയഭാരതി, കൃഷ്ണചന്ദ്രന്‍, ശ്വേത മേനോന്‍, ശ്രീജിത്ത് വിജയി എന്നിവര്‍ ഒന്നിച്ചെത്തിയത്. കൃഷ്ണചന്ദ്രനാണ് ഈ ചിത്രം സോഷ്യൽ മീഡിയയിലൂടെ പങ്കുവെച്ചത്. പഴയതും പുതിയതുമായ പതിപ്പുകള്‍ ഒറ്റ ഫ്രെയ്മില്‍ എന്നാണ് ചിത്രത്തിന് കൃഷ്ണചന്ദ്രന്‍ കൊടുത്തിരിക്കുന്ന തലക്കെട്ട്.
Be the first to comment