മുംബൈ: ശ്രീലങ്കയ്ക്കെതിരേ ഈ മാസം ആരംഭിക്കുന്ന ടി20 പരമ്പരയ്ക്കുള്ള ഇന്ത്യൻ ടീമിനെ ബി.സി.സി.ഐ. ഉടൻ പ്രഖ്യാപിച്ചേക്കും. ടി20 ഫോർമാറ്റിൽ നിന്ന് രോഹിത് ശർമ വിരമിച്ചതോടെ സ്ഥിരമായ ക്യാപ്റ്റൻസി ആര് വഹിക്കുമെന്നതിലും വ്യക്തതയുണ്ടാകും. രോഹിത്തിന് കീഴിൽ വൈസ് ക്യാപ്റ്റനായിരുന്ന ഹാർദിക് പാണ്ഡ്യക്കാണ് സാധ്യത കൽപ്പിക്കുന്നത്. അതേസമയം ഹാർദിക്കിനെ മാറ്റി സൂര്യകുമാർ യാദവിനെ ക്യാപ്റ്റൻസിയിലേക്ക് കൊണ്ടുവരുമെന്നും റിപ്പോർട്ടുകളുണ്ട്.
സൂര്യകുമാർ യാദവിനെ പുതിയ ക്യാപ്റ്റനായി ഉയർത്തിക്കാട്ടുന്നുണ്ടെന്നാണ് ബി.സി.സി.ഐ. വൃത്തങ്ങൾ നൽകുന്ന സൂചന. ഹാർദിക്കിന്റെ ഫിറ്റ്നസ് പരിഗണിച്ചാണ് ബി.സി.സി.ഐ. തീരുമാനം. ദീർഘകാലാടിസ്ഥാനത്തിൽ ക്യാപ്റ്റനെ ആവശ്യമായതിനാൽ സൂര്യകുമാർ യാദവിനെ പരിഗണിക്കുന്നുവെന്നാണ് റിപ്പോർട്ടുകൾ.
കഴിഞ്ഞവർഷം ഡിസംബറിൽ ഓസ്ട്രേലിയക്കെതിരായ ടി20 പരമ്പരയിൽ സൂര്യകുമാർ ഇന്ത്യയെ നയിച്ചിരുന്നു. ശ്രീലങ്കയ്ക്കെതിരേ ജൂലായ് 27 മുതലാണ് ഇന്ത്യയുടെ ടി20 പരമ്പര തുടങ്ങുക. ഇന്ത്യയുടെ പുതിയ പരിശീലകനായി തിരഞ്ഞെടുക്കപ്പെട്ട ഗൗതം ഗംഭീറിന്റെ കീഴിൽ നടക്കുന്ന ആദ്യമത്സരം കൂടിയാണിത്.
Be the first to comment