മണർകാട് കത്തീഡ്രലിൽ എട്ടുനോമ്പ് പെരുന്നാളിന്റെ ക്രമീകരണങ്ങൾ പൂർത്തിയായി

മണർകാട്: മണർകാട് വിശുദ്ധ മർത്തമറിയം യാക്കോബായ സുറിയാനി കത്തീഡ്രലിൽ വിശുദ്ധ ദൈവമാതാവിന്റെ ജനനപ്പെരുന്നാളിനോട് അനുബന്ധിച്ചുള്ള എട്ടുനോമ്പ് പെരുന്നാളിന്റെ ക്രമീകരണങ്ങൾ പൂർത്തിയായതായി കത്തീഡ്രൽ ഭാരവാഹികൾ പത്രസമ്മേളനത്തിൽ അറിയിച്ചു. 60 ലക്ഷത്തോളം വിശ്വാസികളെയാണ് പെരുന്നാൾ ദിനത്തിൽ പ്രതീക്ഷിക്കുന്നത്.

സർക്കാർ വകുപ്പുകളുടെ ഏകോപനത്തോടെ വിപുലമായ ക്രമീകരണങ്ങളാണ് പെരുന്നാളിനായി ഒരുക്കിയിരിക്കുന്നത്. പള്ളിയിലേക്കുള്ള റോഡുകളുടെ അറ്റകുറ്റപ്പണികൾ ത്വരിതഗതിയിൽ നടന്നുകൊണ്ടിരിക്കുന്നു. പള്ളിപരിസരത്ത് പൊലീസ്, എക്സൈസ്, ഫയർഫോഴ്സ്, റവന്യൂ, ഹെൽത്ത് ഡിപ്പാർട്ട്മെന്റുകൾക്കായി ഭക്തജനങ്ങളുടെ സൗകര്യാർത്ഥം വിവിധ കൗണ്ടറുകൾ പ്രവർത്തിക്കുന്നതിനുള്ള ക്രമീകരണങ്ങൾ ചെയ്തു. പള്ളിയുടെ വടക്ക് വശത്തെ മൈതാനത്ത് താൽക്കാലിക ബസ് സ്റ്റാൻഡ് പ്രവർത്തിക്കും. സംസ്ഥാനത്തിന്റെ വിവിധ ഭാഗങ്ങളിൽനിന്ന് കെ.എസ്.ആർ.ടി.സി പ്രത്യേക സർവീസ് നടത്തും.

പെരുന്നാൾ ദിനങ്ങളിൽ പ്രത്യേക സുരക്ഷയ്ക്കായി പള്ളിയിലും പരിസരങ്ങളിലും നിലവിലുള്ള സി.സി.ടി.വി ക്യാമറകൾക്ക് പുറമേ കൂടുതൽ ക്യാമറകൾ സ്ഥാപിച്ച് പൊലീസ് നിരീക്ഷണം ശക്തമാക്കും. വാഹന ഗതാഗതം നിയന്ത്രിക്കുന്നതിനുള്ള ക്രമീകരണങ്ങൾ പൊലീസ് ഉദ്യോഗസ്ഥരുടെ നേതൃത്വത്തിൽ തയ്യാറാക്കി. സെപ്റ്റംബർ ആറ്, ഏഴ്, എട്ട് തീയതികളിൽ വൺവേ സംവിധാനം നടപ്പിലാക്കുന്നതിനുള്ള നടപടികൾ ക്രമീകരിച്ചു. പെരുന്നാൾ ദിനങ്ങളിൽ പള്ളിയിൽ എത്തിച്ചേരുന്ന ഭക്തജനങ്ങൾക്ക് വിപുലമായ പാർക്കിംഗ് സൗകര്യമാണ് ഒരുക്കിയിരിക്കുന്നത്. തെക്കുവശത്തും വടക്ക് വശത്തുമുള്ള മൈതാനങ്ങളിലും സെന്റ് മേരീസ്കോളജ് ഗ്രൗണ്ട്, സെന്റ് മേരീസ് ഐ.ടി.സി ഗ്രൗണ്ട് എന്നിവിടങ്ങളിലും പാർക്കിംഗ് സൗകര്യം സജ്ജീകരിച്ചിട്ടുണ്ട്.

കത്തീഡ്രലിന്റെ ഔദ്യോഗിക ഫെയ്സ്ബുക്ക് പേജിലും യൂട്യൂബ് ചാനലിലും വെബ്സൈറ്റിലും പെരുന്നാളിന്റെ പ്രധാന ചടങ്ങുകൾ തൽസമയം സംപ്രേക്ഷണം ചെയ്യും. എട്ടുനോമ്പ് പെരുന്നാളിന്റെ പ്രധാന ചടങ്ങുകൾ എ.സി.വി. ഗ്രീൻ ചാനൽ മണർകാട് എന്നീ ടെലിവിഷൻ ചാനലുകളിലും ലഭ്യമാണ്. നേർച്ച വഴിപാടുകൾ, പെരുന്നാൾ ഓഹരി എന്നിവയ്ക്ക് ഓൺലൈനിലൂടെ പണം അടയ്ക്കാം. വിശ്വാസികളുടെ പ്രാർത്ഥനാ ആവശ്യങ്ങൾ കത്തീഡ്രലിന്റെ ഇമെയിൽ വിലാസത്തിലോ വാട്സ്ആപ്പ് നമ്പറിലേക്കോ അയയ്ക്കാം.

മിതമായ നിരക്കിൽ ഭക്ഷണം ലഭ്യമാക്കാൻ പള്ളി വക താൽക്കാലിക കാന്റീൻ പ്രവർത്തിക്കും. ഒന്നു മുതൽ ഏഴു വരെ വടക്കു വശത്തെ പാരീഷ് ഹാളിൽനിന്ന് സൗജന്യ നേർച്ചക്കഞ്ഞി ലഭിക്കും. 1501 പേർ ഉൾപ്പെടുന്ന 15 സബ് കമ്മിറ്റികളുടെ നേതൃത്വത്തിൽ ഊർജിതമായ പ്രവർത്തനങ്ങൾ നടത്തിയാണ് വിവിധ തലങ്ങളിൽ പെരുന്നാൾ ക്രമീകരണങ്ങൾ പൂർത്തീകരിച്ചതെന്നും എട്ടുനോമ്പ് പെരുന്നാളിനോടനുബന്ധിച്ചുള്ള വൈദ്യുത ദീപാലങ്കാരങ്ങൾ ഒന്നു മുതൽ പതിനാലാം തീയതി വരെ ഉണ്ടായിരിക്കുമെന്ന് ഭാരവാഹികൾ പറഞ്ഞു.