കൊച്ചി: സിദ്ദിഖിന്‍റെ മുൻകൂർ ജാമ്യാപേക്ഷ ഹൈക്കോടതി തള്ളിയതിൽ സന്തോഷമുണ്ടെന്ന് പരാതിക്കാരി. എന്നാൽ രഹസ്യമായി മൊഴി നൽകിയ പല വിവരങ്ങളും പ്രത്യേക അന്വേഷണ സംഘത്തിലൂടെ പുറത്തു വന്നതിൽ അതൃപ്തിയുണ്ടെന്നും പരാതിക്കാരിയായ നടി പ്രതികരിച്ചു.
ഡിജിറ്റൽ തെളിവുകളടക്കം നശിപ്പിക്കാൻ സിദ്ദിഖിന്‍റെ ഭാഗത്തു നിന്നും ശ്രമം നടന്നു. സാക്ഷികലെ സ്വീധീനിക്കാനും അദ്ദേഹം ശ്രമിക്കുന്നുണ്ട്. പരാതിയില്‍ നടപടി എടുത്ത സര്‍ക്കാരിനും അന്വേഷണ സംഘത്തിനും നന്ദിയുണ്ടെന്നും നടി വ്യക്തമാക്കി.
അതേസമയം, സിദ്ദിഖിനായി പോലീസ് കൊച്ചി അരിച്ച് പെറുക്കുകയാണ്. മുൻകൂർ ജാമ്യാപേക്ഷ തള്ളിയതിനു പിന്നാലെ സിദ്ദിഖിനെ അറസ്റ്റു ചെയ്യാൻ ക്രൈംബ്രാഞ്ച് മേധാവി അനുമതി നൽകിയിരുന്നു. എന്നാൽ സിദ്ദിഖ് എവിടെയാണെന്ന കാര്യത്തിൽ ഇത് വരെ വ്യക്തത വന്നിട്ടില്ല. കാക്കനാട് പടമുകളിലെ വീട് അടച്ചിട്ടിരിക്കുകയാണ്. സിദ്ദിഖിന്‍റേതായ എല്ലാ നമ്പറുകളും സ്വിച്ചിഡ് ഓഫുമാണ്. ബന്ധുക്കളുടെ വീട്ടിലടക്കം പോലീസ് തെരച്ചിൽ നടത്തി വരികയാണ്.
Be the first to comment