ഇന്ന് ദേശീയ വ്യായാമ ദിനം. ശാരീരികപ്രവര്‍ത്തനങ്ങളുടെ പ്രാധാന്യത്തെക്കുറിച്ച് ബോധവത്കരിക്കാനും ആരോഗ്യത്തിനും മികച്ച ജീവിതരീതിക്കും ദിവസവും വ്യായാമം ചെയ്യേണ്ടതിൻ്റെ ആവശ്യകതയെക്കുറിച്ച് അവബോധം സൃഷ്ടിക്കാനുമാണ് വ്യായാമദിനം ആചരിക്കുന്നത്. സ്‌പോര്‍ട്‌സ്, ഔട്ട്‌ഡോര്‍ ആക്ടിവിറ്റികള്‍, ജിം വര്‍ക്ഔട്ട് എന്നിവ ദൈനംദിന ജീവിതത്തില്‍ ഉള്‍പ്പെടുത്തണമെന്ന് ഈ ദിനം ഓര്‍മിപ്പിക്കുന്നു. ഫിറ്റ്‌നസിന് പ്രാധാന്യം നല്‍കുന്നതിനും ആരോഗ്യകരമായ ജീവിതത്തിന് അനുയോജ്യമായ ജീവിതശൈലി ക്രമീകരിക്കേണ്ടതിനും ഈ ദിനം ജനങ്ങളെ പ്രാപ്തരാക്കുന്നു. ദിവസവും വ്യായാമം ചെയ്യുന്നതുകൊണ്ടുള്ള ആരോഗ്യഗുണങ്ങള്‍ എന്തൊക്കെയെന്നു നോക്കാം.
- ദിവസവുമുള്ള വ്യായാമം ഹൃദയത്തെ ശക്തമാക്കുകയും രക്തപ്രവാഹം കൂട്ടി ഹൃദ്രോഗം, ഉയര്‍ന്ന രക്തസമ്മര്‍ദം, പക്ഷാഘാതം എന്നിവയ്ക്കുള്ള സാധ്യത കുറയ്ക്കുകയും ചെയ്യുന്നു. നടത്തം, സൈക്ലിങ്, നീന്തല്‍ തുടങ്ങിയ കാര്‍ഡിയോ വ്യായാമങ്ങള്‍ ആരോഗ്യകരമായ ഹൃദയത്തിനും ദീര്‍ഘായുസ് നേടാനും സഹായിക്കും.
- മാംസപേശികളുടെ ആരോഗ്യം നിലനിര്‍ത്താനും ദൈനംദിന പ്രവര്‍ത്തനങ്ങള്‍ക്കുവേണ്ട വഴക്കം നല്‍കാനും അപകടങ്ങള്‍ തടയാനും ദിവസേനയുള്ള വ്യായാമം സഹായിക്കും. റസിസ്റ്റന്‍സ് ട്രെയ്‌നിങ്, യോഗ, പൈലേറ്റ് എന്നിവ മസിലുകളുടെ ശക്തി കൂട്ടുകയും വീഴ്ചയിലുണ്ടാകുന്ന ആഘാതം പ്രതിരോധിക്കുകയും ചെയ്യുന്നു. പ്രായമായവര്‍ ഇത്തരം വ്യായാമങ്ങള്‍ ശീലമാക്കുന്നത് ഗുണകരമാണ്.
- ഏതെങ്കിലും വ്യായാമത്തില്‍ ഏര്‍പ്പെടുന്നത് കലോറി എരിച്ചുകളയാന്‍ സഹായിക്കും. ദിവസേനയുള്ള വ്യായാമം ഉപാപചയ പ്രവര്‍ത്തനങ്ങളെ നിയന്ത്രിക്കുകയും ലീന്‍മസിലുകള്‍ നിര്‍മ്മിക്കുകയും ചെയ്യും. ഇത് ശരീരഭാരം കുറയ്ക്കാനും ആരോഗ്യകരമായ ഭാരം നിലനിര്‍ത്താനും സഹായകമാകും.
- സന്തോഷവും സമാധാനവും ജനിപ്പിക്കുന്ന എന്‍ഡോര്‍ഫിന്‍ ഹോര്‍മോണുകളും ന്യൂറോട്രാന്‍സ്മിറ്ററുകളും വ്യായാമം ചെയ്യുമ്പോള്‍ റിലീസ് ചെയ്യുന്നു. ദിവസേനയുള്ള വ്യായാമം സമ്മര്‍ദവും വിഷാദവും അകറ്റാനും മാനസികാരോഗ്യം നിലനിര്‍ത്താനും സഹായിക്കും. യോഗ, നടത്തം എന്നിവ സമ്മര്‍ദം അകറ്റാന്‍ സഹായിക്കുന്നവയാണ്.
- വൈജ്ഞാനിക പ്രവര്‍ത്തനങ്ങളെയും ഓര്‍മ, ഏകാഗ്രത, തലച്ചോറിൻ്റെ ആരോഗ്യം എന്നിവയെ പ്രോത്സാഹിപ്പിക്കാനും ദിവസേനയുള്ള വ്യായാമം ഗുണകരമാണ്. ഇതുവഴി ഡിമെന്‍ഷ്യക്കുള്ള സാധ്യത കുറയ്ക്കാനും സാധിക്കും. തലച്ചോറിലേക്കുള്ള രക്തപ്രവാഹം കൂട്ടുന്ന തരത്തിലുള്ള എയ്‌റോബിക് വ്യായാമങ്ങള്‍ ന്യൂറോണുകളുടെ വളര്‍ച്ചയെ ഉദ്ദീപിപ്പിക്കുകയും ന്യൂറല്‍ പ്രവര്‍ത്തനങ്ങളെ പ്രോത്സാഹിപ്പിക്കുകയും ചെയ്യും.
- ദിവസനേയുള്ള വ്യായാമം പ്രതിരോധ വ്യവസ്ഥയെ ശക്തിപ്പെടുത്തുന്നു. അണുബാധ, പനി, ജലദോഷം എന്നിവയ്ക്കുള്ള സാധ്യത കുറയ്ക്കുന്നു. ആന്‌റിബോഡികളുടെയും പ്രതിരോധ കോശങ്ങളുടെയും വളര്‍ച്ചയെ പ്രോത്സാഹിപ്പിക്കുക വഴി നീര്‍വീക്ക സാധ്യത കുറയ്ക്കുകയും രോഗാണുക്കള്‍ക്കെതിരെ പോരാടാനുള്ള ശരീരത്തിൻ്റെ ശേഷി വര്‍ധിപ്പിക്കുകയും മൊത്തത്തലുള്ള ആരോഗ്യം സംരക്ഷിക്കുകയും ചെയ്യുന്നു.
- നല്ല ഉറക്കം ലഭിക്കാനും വ്യായാമം സഹായിക്കും. ദിവസേനയുള്ള ശാരീരിക വ്യായാമങ്ങള്‍ ഉറക്കത്തിൻ്റെ സൈക്കിള്‍ നിയന്ത്രിക്കുകയും വിശ്രമം നല്‍കുകയും ഇന്‍സോംനിയ ലക്ഷണങ്ങള്‍ ലഘൂകരിക്കുകയും ഗാഢനിദ്ര നല്‍കുകയും ചെയ്യും.
Be the first to comment