കോവിഡിനെ പിന്തള്ളി ക്ഷയരോഗം മാരകമാകുന്നു, എംഡിആര്‍-ടിബി അതീവ അപകടകാരി; ലോകത്തെ രോഗികളില്‍ 26 ശതമാനവും ഇന്ത്യയില്‍

2023 ല്‍ ഇന്ത്യയില്‍ 2.55 ദശലക്ഷം പേര്‍ക്കാണ് ക്ഷയരോഗം സ്ഥിരീകരിച്ചത്. 1960 ല്‍ ക്ഷയരോഗ നിയന്ത്രണയജ്ഞം ആരംഭിച്ചതിനു ശേഷം ഇതാദ്യമായിട്ടാണ് രാജ്യത്ത് ഇത്രയധികം കേസുകള്‍ റിപ്പോര്‍ട്ട് ചെയ്യപ്പെടുന്നത്. ലോകാരോഗ്യ സംഘടന പുറത്തു വിട്ട ഗ്ലോബല്‍ ട്യൂബുര്‍ക്കുലോസിസ് റിപ്പോര്‍ട്ട് 2024 പ്രകാരം ഇന്തോനേഷ്യയാണ് രോഗബാധയില്‍ ഇന്ത്യയ്ക്ക് തൊട്ടു പിന്നില്‍. 10 ശതമാനമാണ് ഇന്തോനേഷ്യയിലെ രോഗബാധ.

കഴിഞ്ഞ വര്‍ഷം ലോകത്ത് റിപ്പോര്‍ട്ട് ചെയ്തവയില്‍ 6.8 ശതമാനം വീതം ചൈനയിലും ഫിലിപ്പീന്‍സിലുമാണ്. 6.3 ശതമാനം പാകിസ്ഥാനിലുമാണെന്ന് കണക്കുകള്‍ വ്യക്തമാക്കുന്നു. രോഗം ബാധിച്ചതില്‍ 55 ശതമാനവും പുരുഷന്മാരാണ്. 33 ശതമാനം സ്ത്രീകളും 12 ശതമാനം കുട്ടികളുമാണ്. 2022ല്‍ ലോകത്ത് റിപ്പോര്‍ട്ട് ചെയ്യപ്പെട്ടത് 7.5 ദശലക്ഷം കേസുകളെങ്കില്‍, ഒറ്റവര്‍ഷം കൊണ്ടാണ് രോഗബാധ 8.2 ദശലക്ഷമായി കുതിച്ചത്. ഈ ഗണ്യമായ വര്‍ദ്ധനവ് കോവിഡിനെ മറികടന്ന് കൊലയാളിയായ മുന്‍നിര പകര്‍ച്ചവ്യാധിയായി ടിബിയെ മാറ്റുന്നതായി ലോകാരോഗ്യ സംഘടന വ്യക്തമാക്കി.

സാംക്രമിക രോഗങ്ങളുമായി ബന്ധപ്പെട്ട മരണങ്ങളുടെ പ്രധാന കാരണമായി ക്ഷയരോഗത്തിന്റെ പുനരുജ്ജീവനം മാറുന്നതിനാല്‍, രോഗബാധ തടയുന്നതിനായി അടിയന്തര നടപടി ആവശ്യമാണെന്ന് ലോകാരോഗ്യ സംഘടന പറഞ്ഞു. ടിബി സംബന്ധമായ മരണങ്ങള്‍ 2022-ല്‍ 1.32 ദശലക്ഷത്തില്‍ നിന്ന് 2023-ല്‍ 1.25 ദശലക്ഷമായി കുറഞ്ഞപ്പോള്‍, ടിബി ബാധിച്ചവരുടെ എണ്ണം 10.8 ദശലക്ഷമായി ഉയര്‍ന്നു.