കൊച്ചി: സബ്‌സിഡി ഉല്‍പ്പന്നങ്ങള്‍ വിതരണം ചെയ്യുന്നത് താല്‍കാലികമായി നിര്‍ത്തിവെക്കണമെന്ന ഉത്തരവിന് പിന്നാലെ കിഴക്കമ്പലത്തെ ട്വന്റി20 ഭക്ഷ്യസുരക്ഷാ മാര്‍ക്കറ്റ് പൂട്ടി. ഇതേതുടര്‍ന്ന് സാധനങ്ങള്‍ വാങ്ങാനെത്തിയവര്‍ പ്രതിഷേധവുമായി രംഗത്തെത്തി. റോഡില്‍ കിടന്നും ഇവര്‍ പ്രതിഷേധിച്ചു. ഭക്ഷ്യസുരക്ഷാ മാര്‍ക്കറ്റ് എന്ന പേരില്‍ പ്രവര്‍ത്തിക്കുന്ന സൂപ്പര്‍മാര്‍ക്കറ്റ് തുറന്ന് പ്രവര്‍ത്തിക്കാം എന്നാല്‍ ലോക്സഭാ തിരഞ്ഞെടുപ്പ് കഴിയുന്നത് വരെ ഉല്‍പ്പന്നങ്ങള്‍ സബ്‌സിഡി വിലയ്ക്ക് വില്‍ക്കുന്നത് നിര്‍ത്തണമെന്നായിരുന്നു കളക്ടറുടെ ഉത്തരവ്. ഉത്തരവിന്മേല്‍ സ്വീകരിച്ച നടപടി സംബന്ധിച്ച് മറുപടി നല്‍കണമെന്നും ആവശ്യമുണ്ടായിരുന്നു.
നടപടിക്കെതിരെ ട്വന്റി20 പാര്‍ട്ടി കണ്‍വീനര്‍ സാബു എം ജേക്കബ് രംഗത്തെത്തുകയും ചെയ്തു. മാവേലി സ്റ്റോറുകള്‍ക്കും റേഷന്‍കടകള്‍ക്കുമില്ലാത്ത നിയന്ത്രണം എന്തിനാണ് ട്വന്റി20യുടെ ഭക്ഷ്യസുരക്ഷാ മാര്‍ക്കറ്റുകള്‍ക്ക് ഏര്‍പ്പെടുത്തിയതെന്ന് സാബു എം ജേക്കബ് ചോദിച്ചു. പാവങ്ങളുടെ കഞ്ഞിയില്‍ പാറ്റയിടരുത്. വൃത്തികെട്ട നടപടിയാണിതെന്നും സാബു എം ജേക്കബ് പറഞ്ഞിരുന്നു.
Be the first to comment