യുണിസൺ സര്‍വ്വേ; എന്‍ എച്ച് എസ്സിന്റെ ശോചനീയാവസ്ഥ തുറന്നു കാട്ടി ജീവനക്കാര്‍

ബ്രിട്ടനിലെ ഏകദേശം ഒൻപതിനായിരത്തോളം വരുന്ന ആരോഗ്യ പ്രവര്‍ത്തകരില്‍ നടത്തിയ സര്‍വ്വേ റിപ്പോർട്ട് പുറത്തുവിട്ട് യുണിസൺ യൂണിയന്‍. ബ്രിട്ടനിലെ പല എന്‍ എച്ച് എസ് കെട്ടിടങ്ങളും ചിതലരിച്ചു തുടങ്ങി. മാത്രമല്ല പല ആശുപത്രികളും എലികളുടെയും പാറ്റകളുടെയും മറ്റ് കീടങ്ങളുടെയും പ്രിയപ്പെട്ട ആവാസ കേന്ദ്രം കൂടിയാണ്. എന്‍ എച്ച് എസ് കെട്ടിടങ്ങളെയും ശുചിത്വത്തിലും സുരക്ഷയിലും അവയുണ്ടാക്കുന്ന ആഘാതങ്ങളെയും കുറിച്ച് ഗുരുതരമായ പല ചോദ്യങ്ങളും സര്‍വ്വേ റിപ്പോര്‍ട്ടില്‍ ഉന്നയിക്കുന്നുണ്ട്.

മലിനജല ചോർച്ച, ലൈറ്റിംഗ് തകരാറുകൾ, തകർന്ന ടോയ്‌ലറ്റുകൾ, തകർന്ന മേൽക്കൂരകൾ കൂടാതെ എൻഎച്ച്എസ് കെട്ടിടങ്ങളിൽ എലികൾ, പാറ്റകൾ, മറ്റ് കീടങ്ങൾ എന്നിവയെ കഴിഞ്ഞ വര്‍ഷം പോലും തങ്ങളുടെ തൊഴിലിടങ്ങളില്‍ കണ്ടുവെന്ന് സര്‍വ്വേയില്‍ പങ്കെടുത്ത ആറില്‍ ഒരാള്‍ വീതം പറഞ്ഞതായി സര്‍വ്വേ റിപ്പോര്‍ട്ടില്‍ വ്യക്തമാക്കുന്നു.

എൻഎച്ച്എസിൽ  എല്ലായിടത്തും തകർച്ചയുടെ തെളിവുകൾ ഉണ്ടെന്ന് സര്‍വ്വേ റിപ്പോര്‍ട്ടില്‍ പറയുന്നു. പോൾ ചെയ്ത പകുതിയോളം പേർ (47%) ലിഫ്റ്റുകൾ പ്രവർത്തനരഹിതമാണെന്നും നാലിലൊന്ന് (27%) പേർ ലൈറ്റുകൾ തകരാറിലാണെന്നും അഞ്ചിൽ ഒരാൾ (21%) തകരുന്ന സീലിംഗ് ഉണ്ടെന്നും പറയുന്നു.

ഈര്‍പ്പമാര്‍ന്ന അവസ്ഥയും കേടുപാടുകള്‍ സമയത്ത് തീര്‍ക്കാത്തതുമാണ് ഇത്തരമൊരു സാഹചര്യം ഉണ്ടാകാന്‍ കാരണമെന്നാണ് യുണിസൺ അനുമാനിക്കുന്നത്.

യുണിസണിലെ ആരോഗ്യ പ്രവർത്തകർ തിങ്കളാഴ്ച മുതൽ ലിവർപൂളിൽ നടക്കുന്ന വാർഷിക ആരോഗ്യ സമ്മേളനത്തിനായി ഒത്തുകൂടാൻ തയ്യാറെടുക്കുന്നതിനിടെയാണ് ഈ കണ്ടെത്തലുകൾ പുറത്തുവിടുന്നത്.