ഇന്ന് ലോക ഹീമോഫീലിയ ദിനം; അറിയാം രോഗലക്ഷണങ്ങളും ചികിത്സയും

ലോകത്ത് നിരവധി പേര്‍ അഭിമുഖീകരിക്കുന്ന ഒരവസ്ഥയാണ് ഹീമോഫീലിയ. എന്നാല്‍ ഇതിനെക്കുറിച്ച് പലരും അജ്ഞരാണെന്നതാണ് വാസ്തവം. കൃത്യമായ അവബോധവും ശ്രദ്ധയും കൊടുക്കേണ്ടതും തുടക്കത്തിലേ തിരിച്ചറിയേണ്ടതുമായ ഒരു രോഗമാണ് ഹീമോഫീലിയ. എല്ലാ വര്‍ഷവും ഏപ്രില്‍ 17 ലോക ഹീമോഫീലിയ ദിനമായി ആചരിക്കുന്നു. എല്ലാവര്‍ക്കും തുല്യമായ പരിചരണം: എല്ലാ രക്തസ്രാവ വൈകല്യങ്ങളും തിരിച്ചറിയാന്‍ കഴിയുക എന്നതാണ് ഈ വര്‍ഷത്തെ സന്ദേശം

എന്താണ് ഹീമോഫീലിയ?

രക്തം ശരിയായ രീതിയില്‍ കട്ട പിടിക്കാത്ത അവസ്ഥയാണ് ഹീമോഫീലിയ. ഇത് രക്തസ്രാവം ഉണ്ടാക്കുകയും മുറിവ് ഉണ്ടായാല്‍ രക്തസ്രാവം നിയന്ത്രിക്കാന്‍ സാധിക്കാത്ത അവസ്ഥയിലേക്ക് എത്തിക്കുകയും ചെയ്യുന്നു. രക്തം കട്ട പിടിക്കാന്‍ സഹായിക്കുന്ന ഘടകങ്ങളുടെ അഭാവമാണ് ഹീമോഫീലിയയിലേക്കു നയിക്കുന്നത്. ഹീമോഫീലിയ രോഗികളില്‍ ഫാക്ടര്‍ VIII എന്ന ആന്‌റിഹെമോഫീലിക് പ്രോട്ടീന്‌റെയോ(ഹീമോഫീലിയ എ) ഫാക്ടര്‍ IXഎന്ന ക്രിസ്തുമസ് പ്രോട്ടീന്‌റെയോ(ഹീമോഫീലിയ ബി) അഭാവം ഉണ്ടാകാം. ഈ ഫാക്ടറുകളുടെ അഭാവത്തിൻ്റെ തോത് അനുസരിച്ചാണ് രോഗതീവ്രത നിര്‍ണയിക്കുന്നത്.

സ്ത്രീകളെ അപേക്ഷിച്ച് പുരുഷന്‍മാരിലാണ് ഹീമോഫീലിയ കൂടുതലായി കണ്ടുവരുന്നത്. ഹീമോഫിലിയ എയാണ് കൂടുതലായി റിപ്പോര്‍ട്ട് ചെയ്യപ്പെടുന്നത്. രക്തം കട്ടപിടിപ്പിക്കുന്ന പ്രോട്ടീനുകള്‍ക്ക് നിര്‍ദ്ദേശം നല്‍കുന്ന ജീനുകളുടെ നാശം കാരണമാണ് പ്രധാനമായും ഈ അവസ്ഥ ഉണ്ടാകുന്നത്. ഇത് രക്തം കട്ടപിടിക്കല്‍ അവസ്ഥയെ പ്രതികൂലമായി ബാധിക്കും. എക്‌സ് ക്രോമസോമിലാണ് രക്തം കട്ടപിടിക്കുന്ന ജീനുകള്‍ ഉണ്ടാകുക. സ്ത്രീകളില്‍ രണ്ട് എക്‌സ് ക്രോമസോമും പുരുഷന്‍മാരില്‍ ഒരു എക്‌സ് ക്രോമസോമുമാണ് കാണപ്പെടുന്നത്.